Maddi Amiano, Judoka
Altzoko gaztea 8 urte besterik ez zituela hasi zen judoan; harrezkero sari asko irabazi ditu, eta orain gutxi bere kirol ibilbide oparoarengatik saria eman diote. Tolosan egindako XIV. Elkartasun Krosean lortu du azken saria Maddi Amianok (Altzo, 1993).  Sari berezia da, kirol ibilbideagatik emandakoa baita. Izan ere, 10 urtez judoan egindako kirol ibilbideagatik saritu dute. Gasteiz eta Altzo artean dabil azken hilabeteetan ikasketak eta judoa uztartuz, denboraldi berrirako prestaketan ari den bitartean.

Maddi Amiano

Beste sari bat duzu eskuartean, urteari amaiera emateko sari polita, ezta?
San Silvestre krosean eman zidaten Samaniego eta Orixe ikastetxeek nire kirol ibilbideagatik. Eta oso pozik jaso ere, espero ez nuen saria izan da eta. Zortzi urte nituenetik egiten dut judoa, gustuko kirola dut eta polita da egindako lana aitortzea.
2012. urteko denboraldiari begira egongo zara. Zeintzuk dira zure helburuak aurtengoan?
Aurten lesio luze batetik nator eta gogotsu nago. Espainiako Txapelketan egotea da helburu nagusia. Horretarako, urtarrilean jokatuko den Gipuzkoakoa irabazi beharko nuke lehenengo eta gero, otsailean Euskadiko Txapelketan ere garaipena lortu beharko nuke. Maiatzean jokatuko da Espainiakoa. Hemen irabaziz gero, Europako ateak irekiko zaizkit, baina Espainiakoan lehenengo postua lortzea zaila izango da. Judoka onak baitaude estatuan.
10 urte daramatzazu judoan, zenbat sari lortu dituzu urte hauetan?
Hogeitik gora sari ditut etxean. 2006. urtean Espainiako Txapelketan banakakoan eta binakakoan irabazi nuen. Sari horiek ate asko ireki zizkidaten. Harrezkero, lau aldiz izan naiz Espainiako Txapelketan. 2009. urtean brontzea lortu nuen, eta ni baino maila bat altuagokoen aurka lehiatu nintzela nabarmendu behar da.
Gerriko beltza zara, judoan gorengo maila.
16 urte betetzean azterketa egiteko aukera dago eta gainditu nuen.  Gerriko beltzarekin lehiatzen dut orain.
Ikasketak direla-eta Gasteizen zaude orain, nola antolatzen dituzu entrenamenduak?
Astean 5-6 ordu entrenatzen ditut. Gasteizen bi egunez eta Tolosan betiko entrenatzailearekin ostiraletan. Horrez gain, ostiraletan Amezketako umeak entrenatzen ditut, 38 umeko bi talde ditut.
Kirolarekin lotutako ikasketak aukeratu dituzu…
Jarduera Fisiko eta Kirolaren Zientzien fakultatean ikasten hasi naiz, hauxe dut lehen urtea. Argi nuen, kirolarekin zerikusia zuen zerbait ikasi nahi nuela. Judotik bakarrik bizitzea ia ezinezkoa da eta ateak ireki behar dira.
Nola ikusten duzu judoka moduan zure etorkizuna?
Judotik bizitzeko hoberenen artean egon behar da eta dedikazio osoa ekaini, gainera. Ziurrenik aurtengoa izango da nire azken urtean txapelketetan. Datorren urtean junior maila atzean utzi eta 48 kiloz gorakoetan aritu beharko nuke, orain arte 44 kilo azpikoan lehiatu dut-eta. Hala ere, urteak berak esango dit noraino iritsiko naizen. Pixkanaka gutxituz goaz eta geratuko direnak onenak dira.
Emakume askok praktikatzen al du judoa?
Neska askok praktikatzen dugu judoa, esaterako, Tolosan neska gehiago gara entrenamenduetan. Hori bai, lehian gutxiago garela esan behar da.
8 urte besterik ez zenituela hasi zinen judoa egiten. Zergatik aukeratu zenuen kirol hori?
Denek egiten didate galdera bera, nire anaia txikitan oso mugitua zen eta medikuren batek gomendatu zion. Ni ere bere aitzakian hasi nintzen eta oso gustukoa dudan kirola da. Kirol bortitza dela dirudi, baina ez da horrela. Jendeak karatearekin nahasten du eta judoan giltzak egitea da kontua, behin ere ez da aurkaria jipoitzen.

Etiketak: Altzo, Judoa, Kirola, Maddi Amiano