Alegialdeko Hitza » Abaltzisketa

Abaltzisketan eta Amezketan makil hotsak entzungo dira gaur

Alegialdeko Hitza — Sat, 18 Feb 2012 23:19:49 +0000

Gerra garaian galdutako ohiturari irmo eusten diote Abaltzisketan eta Amezketan, eta batean zein bestean, baserriz baserri ariko dira gaur txantxoak eta talaiak euren dantzaren ordainetan mokadutxo ederrak hartuz.
Abaltzisketan gaur ospatuko dituzte inauteriak. 08:00etan egiten dute hitzordua txantxoek baserrietako ibilbideari ekiteko. Zortzi dantzari, akordeoi jotzailea, saskia daramana eta nagusiak osatu ohi du taldea. Baserrira iritsi aurretik nagusiak adarra jotzen du iristear direla ohartarazteko. Erratza pasatzen dute dantza egin behar duten lekuan, eta ondoren makil dantza egiten dute. Amaitutakoan baserritarrek jatekoa eta edatekoa eskaintzen diete indarrak berritzeko. Goizean zehar, elizaren aurrean ere egingo dute dantza, eta ibilbidea amaitzean bazkaltzera joango dira. Txantxoak alkandora eta galtza zuriak, gorbata beltza, gerriko gorria eta bi zapi sorbaldan gurutzatuta janzten dira. Garai batean, baserrietan biltzen zutena ostatuan saldu eta diru horrekin bapo afaldu eta festak antolatzen zituzten.
Amezketan, gaur eta bihar
Bestalde, Amezketan gaur eta bihar izango dira talai dantzariak. Kasu honetan neska-mutilez osaturiko taldea mahoizko galtzekin, alkandora txuriz, gerriko eta txapela beltzez, abarkekin eta zapi koloretsuz jantzita irteten dira. Abaltzisketan erabili ohi duten doinu berarekin dantzatzen dute, baina euren kasuan, dantza arinagoa da.
Bai batean zein bestean, inauteriak heldu direla iragartzen duten makil hotsak izaten dira protagonista.

EGITARAUA
Abaltzisketa
Otsailak 19, igandea.
08:00: Dantzariak, bi mozorroak eta soinu-jotzailea elkartuko dira, eta Orendain aldean dauden baserriak zeharkatuko dituzte.
10:30: Elizaren aurrean Makil Txiki dantza eskainiko dute.
13:00: Makilen talaia zabalduko dute Txindokipean; mezatik ateratzen diren guztiei dantza egiten diete, eta ondoren, Larraitz aldeko baserrietara joko dute.
Amezketa
Otsailak 19, igandea.
08:00: Zazpi-Iturri elkartearen inguruan bildu, eta puska biltzen hasiko dira baserriz baserri. Bi talde ariko dira horrela: lehen taldekoek, Sakelatik abiatuta, Ugarten dantzatuko dute, eta Zubillaga auzora joango dira. Bigarren taldekoak, Petxunetik abiatuta, Zubillaga auzora joango dira dantzatzera. Zubillagako bidegurutzean, bi taldeak elkartuko dira eta herriko kaleak zeharkatuko dituzte. Azken dantzak Ergonen egingo dituzte.

Otsailak 20, astelehena.
08:00: Plazan elkartuko dira, eta bi taldetan banatuta, Bedaio eta San Martin aldeko baserrietara joango dira. Lehen taldea Ugartetik Larreta baserrira joango da, eta bigarrena, berriz, Liola aldetik gerturatuko da Larreta baserrira. Bertan elkartuko dira dantzari guztiak, eta elkarrekin, inauterietako azken dantza saioa eskainiko dute.

Abaltzisketak irabazi du Ikaztegietaren aurkako futbol partida

Alegialdeko Hitza — Thu, 05 Jan 2012 10:56:07 +0000

Abaltzisketa-Ikaztegieta lagunarteko partida

Futbol partida berezia jokatu zuten atzo, Ikaztegietako frontoian, Abaltzisketako Txalburuk taldeko eta Ikaztegietako gazteek. Norgehiagoka lagunartekoa bazen ere, futbolariek serio hartu zuten eta jokaldi ederrak ikusi ahal izan ziren. Partida 1-7 amaitu zen, eta ondoren, askaria egin zuten.
Antolatzaileen hitzetan, Tolosako Shanti Txapelketa aprobetxatu dute partida hau antolatzeko, izan ere, taldeak osatu dituzte aipatu lehiaketarako eta honi nolabaiteko jarraipena ematea pentsatu dute.
Era berean, aurtengoa eredu hartuta datozen urteetan ere herri txikien arteko partidak antolatzeko nahia azaldu dute.

Abaltzisketa eta Ikaztegieta nor baino nor, futbolean

Alegialdeko Hitza — Wed, 04 Jan 2012 07:55:35 +0000

Ikaztegietako eta Abaltzisketako neska-mutilek lagunarteko futbol partida jokatuko dute, gaur.
Abaltzisketako Txalburu taldeko gazteak ariko dira Ikaztegietako jokalarien aurka. Partida Ikaztegietako frontoian
jokatuko dute, eta 16:30etik aurrera ikusi ahal izango da.
Partida ikustera gerturatzeko gonbita luzatu dute antolatzaileek, eta baita giro onean bi taldeak animatzeko ere.

‘Ametsen fabrika’ antzerkia izango da Abaltzisketan

eneritz maiz — Wed, 28 Dec 2011 06:30:56 +0000

Guraso Elkarteak antolatuta, etzi, hilak 30, Ametsen fabrika izeneko antzerkia izango da. Abaltzisketako Kultur Etxean 17:00etan hasiko da. Antzezlana, 2-12 urte arteko haurrei zuzendua dago. Antzerki emanaldiaren aurretik, 16:00etan, gerturatzen diren guztientzat merienda emango dute Larrunarri Elkartean.

Abaltzisketako Txalburu eskolako zozketaren irabazleak

Alegialdeko Hitza — Mon, 26 Dec 2011 14:12:36 +0000

Txalburu eskolak gabonetako antolatu duen zozketako zenbaki sarituak hauek dira: 2.172aren jabeak saskia irabazi du, eta 1.238 zenbakiarenak afaria.

Gasolina usainak erakarrita

eneritz maiz — Thu, 22 Dec 2011 07:00:57 +0000

Aritz Murua Agirreri (Abaltzisketa, 2001) txiki-txikitatik gustatzen zaio gasolina usaina eta abiadura. Hamar urte ditu, eta Abaltzisketako Txalburu eskolan ari da ikasketak egiten. Futbolean eta pilotan jolastea gustatzen zaio, baina bere adineko haurrengandik bereizten duen afizio bat du: iaztik hasita, kart edo auto txikien lasterketetan parte hartzen du.

Aritz Murua

Lehen denboraldia izan badu ere, emaitza bikainak eskuratu ditu Abaltzisketako gaztetxoak. Euskadiko txapelketan hirugarren postua eskuratu du, eta Nafarroako Ipar Karting txapelketan lehen postua eskuratu du. Aitak onartzen du, neurri handi batean berarengatik datorkiola autoekiko afizioa. Bera lasterketetarako autoak preparatzen ibilia da. Abaltzisketatik asko jaisten direla kontatu du Amezketako Joxe Karrerarengana. Bertan, txiki- txikitatik ikusi izan ditu kart autoak, eta aitak, autoen artean ibiltzen zela gogoratu du.
Bizikletatik motorrera
Bizikletan ibiltzen ikastearekin batera, motor gainean ibiltzen hasi zen Aritz Murua. «Bizilagunak motorzaleak ditugu, eta bizikletan ibiltzen ikastearekin batera, hiru urte zituela, lau gurpileko motorra utzi zioten Aritzi. Hura menperatzean, bi gurpileko motorrera pasa zen sei urterekin», gogoratu du Larraitz Agirre amak. Gasolina usaina txikitatik izan du inguruan.
Olaberriako Karting zirkuituan sozio eginak daude. Bertan, Olaberria Karting Series egiten dute, eta iazko udaran parte hartu zuen lehen aldiz, ezustekoa emanez: lasterketa irabazi zuen Aritz Muruak.
Emaitza onak ikusita, berotu egin ziren, eta kart berria erosi zuten, lasterketetan parte hartzeko. Urte hasieran federatu zen lehen aldiz.
Bederatzi urtetik hamaika urte bitarteko kategorian parte hartu du, alebinen mailan. Federazioak egutegi bat dauka, eta Euskadiko Txapelketan 11 lasterketa egiten dituzte; Bizkaian Gueñesen, Burgosen Villarcallon, Nafarroan Los Arcosen, eta Gipuzkoan Olaberrian. Lasterketa bat, Zumarragako kaleetan izan da.
Lasterketetan, 100 kilometro orduko abiadura hartzera iritsiko direla azaldu du Aitor Murua aitak. Lasterketa bakoitzean 12 bueltako bi itzuli egin behar izaten dituzte. Aritz Muruak «erraza» dela dio lasterketetan ibiltzea. Hasieran beldur pixka bat bai, baina beldurra baino gehiago urduritasuna izaten duela azaldu du. Bihurgunetan, balazta zenbat eta beranduago zapaldu, orduan eta azkarrago doa autoa, eta horretara bultzatzen dituzte. Hori egiteko, ordea, «ausartak» izan behar dira. Batzuetan «gogorra» ere egiten zaiola onartu du gazteak. «Ordu asko izaten dira, eta kontzentratuta egon behar izaten du», gaineratu du aitak.

Aritz Murua

Ordu pila bat sartu behar dira ikasten joateko. Olaberrian eta Los Arcosen asko ibili da urtean zehar entrenatzen. «Los Arcosen esaterako goiz batean 500 itzuli ematera iritsitako egunak izan ditu», azaldu du aitak. Espirit Taldeko Mikel Nazabal du irakaslea, eta lehen urtean asko lagundu diote. Eta Joxe Karreraren lasterketetako esperientziak babes handia eman die, eta baita mekaniko bezala ere.
Afizio garestia aukeratu du, eta guztia poltsikotik jarri behar izaten dute. Familia osoak onartu du hori, «eta zenbat eta gorago joan, orduan eta garestiagoa da», gaineratu du aitak. Kart autoaren mantentzeak lan handia eskatzen du, eta lasterketa bakoitzerako prestatu behar izaten dute. Lau gurpilak ere berriak jartzen dizkiote. «Buzoa, kaskoa, lepokoa, saihetsak babestekoa, oinetakoak,…janzten ditut», azaldu du Aritz Muruak. Legeak horrela eskatzen du, eta lasterketa guztietan kontrolatzen diete.
Lagunek zer esaten dioten galdetzean, «ezer ere ez» esan du segituan. Hala ere, lagun batzuk izan ditu Olaberriako lasterketetan nola ibiltzen den ikusten.
Zaletasuna asteburura mugatzen dute. Astean zehar eskola eta eskolaz kanpoko jardueretan ibiltzen da. Hurrengo denboraldiari begira jarrita daude. Hamaika urte beteko dituenez, kategoriaz igo daiteke. Lasterketak auto handiagoarekin egingo lituzke, eta pilotuak berak mailaz igo nahiko luke. Profesional mailan, Vettel gustatzen zaio. Ahaztu gabe, Aritz Muruak eskerrak eman nahi dizkie Espirit Taldeko Mikel Nazabali eta Amezketako Joxe Karrerari.

Egunez enpresako 24 langileek “lanik gabe” geratu direla salatu dute

Alegialdeko Hitza — Sat, 17 Dec 2011 18:19:10 +0000

Elkarretaratzea egin dute Abaltzisketako plazan Egunez enpresako langileek

Abaltzisketako festa eguna aprobetxatu dute Egunez eraikuntza enpresako langileek protesta egiteko. “24 langile lanik gabe” geratu direla salatu dute. Eta “bi aparteko paga, eta ordu osagarri batzuk” kobratu gabe dituztela azpimarratu dute; aparteko paga bata 2010eko abendukoa da, eta bestea 2011ko ekainekoa.

Abiadura Handiko Trenaren obretan ari ziren lanean Legorreta UTE zatian batzuk, eta besteak, Antzuolakoan.

12:00etatik aurrera, pankartaren atzean egon dira.

San Tomas Eguna ospatu dute Abaltzisketan

eneritz maiz — Sat, 17 Dec 2011 17:15:52 +0000

Negua iritsi da, eta Txindoki zurita esnatu da Abaltzisketa. Hala ere, eta egun batzuk aurreratuta bada ere, San Tomas Eguna ospatu dute.

10:00ak aldera txerriaren bueltan festa izan da herriko plazan.
Beste aldetik, urtero bezala, Txalburu Eskolak antolatuta San Tomas azoka egin dute:barazkiak eta frutak; baserriko animaliak; eskulanak eta etxeko postreak izan dira.
Eguraldi txarrari aurre egin, eta eguna alaitzeko bertsolariak eta trikitilariak ere izan dira. Dastatzeko berriz, txerria izan dute.

Hirugarren adinekoak mahaiaren bueltan elkartu dira

eneritz maiz — Mon, 21 Nov 2011 15:07:36 +0000

Igandean Amezketan eta larunbatean Abaltzisketan hirugarren adinekoek beraien eguna izan zuten. Abaltzisketan, Larraitzeko ermitako meza ondoren, bazkaria izan zuten. Amezketan, berriz, urteroko ohiturari jarraituz meza nagusia eta bazkaria izan zituzten. Gorostidi eta Muñoa bertsolariez gain trikitilariak ere izan zituzten giroa alaitzeko.

Ehunmilak Lasterketako arropa salgai

Alegialdeko Hitza — Thu, 17 Nov 2011 16:27:51 +0000

Ehunmilak Mendiko Lasterketako arropa salgai egongo da, etzi, larunbata, 16:30etatik aurrera, Larraitz-Gain jatetxean. Bertan txalekoak, kamisetak eta sudaderak egongo dira salgai. Kalitate onekoak eta erdi prezioan.