Alegialdeko Hitza » Albiztur

Albizturgo Gomaiztegi baserria erre da

Alegialdeko Hitza — Fri, 27 Jan 2012 08:56:12 +0000

Bart Albizturgo baserri bat erre da. Herrizaingo sailak eta suhiltzaileek azaldu dutenez, sutean pertsona bat zauritu da. Pertsona honek eskuetan erredurak izan ditu eta Tolosako Asuncion klinikan dago.

Antza denez sutea atzo 22:30ean hasi zen, eta baserria erabat kiskalita geratu da.

Santa Marina auzorako bidea itxiko dute, bihar

Alegialdeko Hitza — Wed, 18 Jan 2012 06:45:02 +0000

Albizturko udal barrutiko GI-3042 Argisaingo Santa Marina auzora sartzeko errepidea erabat itxiko dute. Bihar, hilak 19, 09:00etatik 12:00etara izango da.

Zeharretarako sekzioa hobetzeko eta bionda hesia jarri behar dute. Lan horiek egiteko auzoko sarreran tamaina ertaineko makineria jarri behar dute, eta errepidea itxi behar dute.

Herri batzarra egingo dute Albizturren

Alegialdeko Hitza — Thu, 15 Dec 2011 17:27:22 +0000

Albizturgo Udalak Herri Batzarra egingo du, bihar, hilak 16. 21:00etan izango da udaletxeko balio anitzeko gelan. Herritar guztiak parte hartzera gonbidatu dituzte.

Gaur egunera arte, udal gobernu berriak landu dituen gaiak eta herriko ondarearen gain hartu diren erabakien berri emango du; Talde ezberdinen osaketa, erabaki potoloak diren gaietan herritarren parte hartzea bultzatuz; Frontoiaren pintaketaren kostua eta aurrekontua; Obra ordenantzaren argibideak, eta 2012ko aurrekontuaren moldaketa aurkeztuko dituzte.

Zortzi alkate eskolaz hizketan

eneritz maiz — Thu, 24 Nov 2011 16:02:15 +0000

Gaur arratsaldean Albizturgo Herri Eskolako haurrak, zazpi alkate ohiekin eta gaur egungoarekin elkartu dira udaletxean. Herri eskolaz hizketan ari dira, eta alkateek, ikasleek egindako galderei erantzuten diete.

Garai ezberdinetako kontuak entzuten dituzte ikasleek, gurasoek eta irakasleek. Eskolaren beharraz, obrez, harremanez, ikasle kopuruaz, jangelaz,… hitz egiten dute garaian garaiko pasadizoak gogoratuz. Elkarrizketa guztia grabatzen ari dira.

Tolosaldeko osasun publikoaz hitz egingo dute

eneritz maiz — Wed, 23 Nov 2011 12:39:13 +0000

Tolosaldeko Osasun publikoaren aldeko plataformak hitzaldia eskainiko du. Albizturko udaletxeko aretoan izango da, hilaren 25ean, 20:00etan hasita. Osakidetzak etorkizunera begira egin nahi dituen aldaketen berri emango dute.

Kontsumobideren hitzaldia, Albizturren

Alegialdeko Hitza — Thu, 17 Nov 2011 16:29:10 +0000

Astelehenean, hilaren 21eaan, Eusko Jaurlaritzako Kontsumobide sailak sustatutako ekimenak, 5 zentzumenekin kontsumitu kanpainaren barruan Gutxiago gastatzea gutxiago erosi gabe hitzaldia eskainiko du. 18:00etan izango da, udaletxeko hitzaldi aretoan.

Santamaña auzoko festetan herri kirolariak eta herri afaria izango dira

Alegialdeko Hitza — Thu, 14 Jul 2011 16:48:59 +0000

Santamañako festak ospatuko dituzte igandean, izen bereko Albizturko auzoan. Herri kirolen erakustaldia eta herri afaria dira ekitaldi nabarmenenak. 12:30ean meza izango dute eta ondoren Malbadi trikitilariek girotuko dute goiza.
Arratsaldean herri kirolen tartea izango da. 18:00etan hasiko da ekitaldia, eta Unai Otaño eta Joseba Otaegi aizkolariak eta Juan Mari Beliziosoro harri-jasotzailea ariko dira. Herri kirolarien erakustaldia eta gero, herri afaria egingo dute. Malbadi trikitilariek girotuko dute afaria.

Frontoia pintatzen ari dira

Alegialdeko Hitza — Thu, 14 Jul 2011 16:12:00 +0000

Albizturko frontoiaren pintatze lanak bukatzear daude. Gregorio Iraola alkateak azaldu duenez, «egoera nahiko aldebresean zegon. 1993an egin zen, eta ordudanik ez da berrikuntzarik egin». Ezker paretak pintura harrotuta zuen.

«Proiektu bat dugu oso garbia, hau da, herrigintza proiektua»

Alegialdeko Hitza — Wed, 13 Jul 2011 16:41:51 +0000

Gregorio Iraola (Albiztur, 1965) da Albizturko alkatea. Lehenengo aldiz hartu du kargu publiko bat. Aralar alderditik aurkeztu da, independente moduan.
Albizturren herri zerrendak aurkeztu izan dira. Zuek Aralar bezala aurkeztu zarete.
Gai honetan bi puntu daude argitu behar direnak. Alde batetik, herri plataforma erregistratu ahal izateko epe bat dagoela. Epe horretatik aurrera, alderdi politikoa behar du izan. Zerrenda osatu ezinik egon ginen, eta azkeneko unean osatu genuen. Horregatik alderdi baten beharra izan genuen. Hiru aukera genituen: Bildu, Aralar eta EAJ; eta erdikoa aukeratu genuen, besteak beste, zenbait alderdirekin joateko adostasunik ez zegoelako, eta bere aldetik saiatu zirelako zerrenda bat osatzen. Bestalde, independente bezala aurkeztu gara, inor ez da alderdi horretako afiliatua. Independente sentitzen gara alde guztietatik, gure nortasuna daukagulako.
Zer irakurketa egiten duzu lortutako emaitzei buruz?
Espero genuen egoera bat eman da, eta espero baino bozka gehiago jaso genituen. Beraz, irakurketa positiboa egiten dugu. Boto zuriak ere izan dira, oso nukleo zehatz batetik emandakoak, gure ustez. Beraiek azaldu beharko lukete zergatik eman dituzten bozka horiek.
Aurreko legealdiaren zer balantze egiten duzue?
Talde osoak oso garbi dugu gure lana karguak hartu genituenean hasi zela. Ekainaren 11ren aurretik gertatu zenaren inguruan, ikuspegi bat izan dezakegu, baina ez dugu baloraziorik egingo. Ez zaigu zuzena iruditzen, ez delako hemen lana politikoki egiten. Hemen herri mailan egiten da lana, eta, beraz, ez zaigu zilegi iruditzen baloraziorik egitea.
Zer egitasmo dituzue legealdi honetarako?
Aurrera begira, gure asmoa, alde batetik, udal politika aldatzea da. Bestalde, alkatearen boterea eta jabegoa deuseztatzea, neurri batean. Horrez gain, udala erakunde itxi bat izan beharrean, herriko eraikin bat bihurtzea, irekia herritarrentzat. Eta, posible den heinean proiektuak egitea, baina beti herritarren parte hartzea bilatuz, ahal den guztia, jendeak ematen duen neurrian.
Proiektu zehatzen bat baduzue?
Proiektu bat badugu oso garbia, hau da, herrigintza proiektua. Herritarren parte hartzea, herritarren inplikazioa, hori da dugun proiektua. Eta, bestalde, hormigoizko proiekturik ez dugu aurreikusten.
Zer egoeratan dago plan orokorra?
Egun Eusko Jaurlaritzan dago plan orokorra. Berrikuspen bat izango du, iruditzen zaigulako gehiago landu behar dela herriarekin, ezin delako aurreikusten den modelo bat inposatu. Eta ez dituelako, hasiera batean, Albizturko beharrak inondik inora betetzen. Gure ideia da plana berrikustea, bere osotasunean, eta herritarren beharrak betetzea. Aurreikusten diren zenbait gauza eztabaida zabalago batetik jorratu nahi ditugu, eta behar bada, kontsulta bidez planteatu. Adibidez, autoen zirkulazioa edo etxeak egiteko modua.
Apaizetxearen proiektuaren egoera nola dago?
Aurreproiektu bat dago eta horren erdiaren diru laguntza onartuta dago. Falta da beste diru laguntzaren erdia lantzea. Onartutakoa Eusko Jaurlaritzaren Erein programatik dator, eta beste erdia Foru Aldunditik landu beharra dugu. Datorren urtera begira hasiko ginateke eskatzen. Aurreproiektua planteatuta dagoen bezala, erabilera aldaketa bat planteatzen dugu. Gure ikuspegiz aldaketa nahiko justifikatua, eta gizarte laguntzailearen aldetik babestua. Nahi dugu ere batzorde bat planteatzea herriko hainbat eragilerekin erabakiak hartzeko, udalak hartu beharrean.
Festak antolatzen ariko zarete.
Filosofia pixka bat aldatu da festaren antolakuntzan: udalak antolatu eta gazteek lana egin beharrean, gazteek festa antolatu eta herriak laguntzea. Gazteak ari dira antolaketa egiten, eta bideratuta dute egitaraua.

Jose Luis Korta, Kultur Asteari amaiera emateko

Alegialdeko Hitza — Mon, 30 May 2011 17:23:48 +0000

Kultur Asteari amaiera emateko, asteazkenean, Jose Luis Korta arraun entrenatzaile oriotarra izango da Albizturren. Saioa 19:30ean hasiko da eta berarekin hitz aspertu bat egiteko aukera izango da, tartean arraunari eta telebista munduari buruz.