Alegialdeko Hitza » Alegia

Alegiako Udalak eta eskolak Saharar herriarekiko elkartasuna indartu nahi dute

eneritz maiz — Tue, 24 Jan 2012 11:36:28 +0000

Alegiako Udaleko Gizarte Zerbitzuek eta ikastetxeak Saharar herriarekiko elkartasuna indartu nahi dute. Tolosaldea Sahararekin elkartearekin batera urtero egiten dute janari bilketa, baina azken urteetan jendearen ekarpena beherantz joan dela ikusita, ekimena indartu nahi dute.

Saharar errefuxiatuen kanpamenduetarako materiala bildu nahi dute

Udal ordezkariekin batera, gizarte zerbitzuetako langilea eta ikastetxeko irakaslea elkartu dira. Saharar herriarekiko elkartasuna lortzeko, herritarrei deia luzatu nahi diete. Bakoitzak bere ahalmenen araberako ekarpena egin dezake.

Gaia jorratzeko, ikastetxean, elkartasun baloreak lantzen ari dira ikasleekin.

Atzo hasi zuten kanpaina, eta hilaren 31a, asteartea, bitartean luzatuko dute. Materiala, eskolan eta Gizarte Zerbitzuetan jasoko dute. Eskolara, eskolako ordutegian eraman beharko da, eta gizarte zerbitzuetan utzi nahi izanez gero, 09:00etatik 14:00etara joan behar da.

Material ezberdina bildu nahi da jatekoa alde batetik, eta eskolako materiala bestetik.

Jatekoen artean: lekaleak, sardinak eta hegaluzea oliotan, pasta, arroza, azukrea eta olioa. Konpresak eta helduentzako pixoihalak ere jasoko dituzte.

Eskolak eraikitzen ari dira, eta dagoeneko 44 ikasle daude. Behin obrak bukatutakoan, 120 ikasle hartuko dituzte. Horretarako, eskolako materiala bildu nahi dute: arkatzak, ezeztekoak, txorroskiloak, koadernoak,…

Era berean, bigarren eskuko kamioiak erosten dituzte materiala eraman ahal izateko. Horretarako, dirua emateko aukera ere badago, eta bi kontu korronte jarri dituzte:

Kutxa: 2101 00 6722 0011180866 eta La Caixa: 2100 17 5868 0200077750.

Maxux Arsuagaren margolanak jarri dituzte

eneritz maiz — Wed, 18 Jan 2012 06:45:57 +0000

Alegiako Jubilatuen tabernak Sara Gomez amezketarraren argazkiak, Maxux Arsuaga anoetarraren margolanengatik aldatu ditu. Larunbatean jarri zituzten koadroak, eta otsailaren 13a bitartean egongo dira Jubilatuen tabernan zintzilik.

Duela hamar urte hasi zen Maxux Arsuaga margotzen, eta bigarren aldiz jarri ditu bere lanak ikusgai. Margotzea «gustuko» duela azaldu du, eta «ia lan guztiak olio pinturarekin margotzen ditut». Margolanak erakusteaz gain, erosteko aukera ere ematen du anoetarrak.

Jubilatuen tabernako zenbaki saritua 907 da

eneritz maiz — Tue, 17 Jan 2012 06:16:47 +0000

Alegiako Jubilatuen tabernak ostiralean egin zuen Gabonetako saskiaren zozketa. Zenbaki saritua 907a izan da. Jubilatuen tabernara gerturatu beharko du txartela duenak.

Muñoa eta Lizarralderekin bertso afaria, bihar

eneritz maiz — Thu, 12 Jan 2012 10:11:11 +0000

Alegiako Zazpi Astoren Gainean bertsozale taldeak bertso afaria antolatu du. Bihar, hilak 13, izango da, eta Unai Muñoa eta Ander Lizarralde bertsolariak izango dira. Apuntatzeko zerrendak herriko tabernetan jarri dituzte, eta izena bihar azken momentura arte eman ahalko da. Afaria 10 euro inguru kostako da.

Txintxarri Abesbatza Kultur Elkartearen batzar nagusia, gaur

Alegialdeko Hitza — Tue, 10 Jan 2012 06:10:05 +0000

Urte hasiera guztietan egin ohi duen legez, urteko batzar nagusia egingo du Alegiako Txintxarri Abesbatza Kultur Elkarteak. Gaur, hilak 10, herriko kultur etxean izango da, eta bi deialdi luzatu dituzte. Lehen deialdia 20:00etan izango da, eta bigarrena 21:00etan.
2011. urtean Elkarteko bi abesbatzek –Txintxarri Txikik eta Txintxarrik– egin dituzten ekitaldiak, eta diru kontuak aztertuko dira, eta horrela badagokio, onartu egingo dira. Eta 2012ari begira bi koruek dituzten aurreikuspenak ere aurkeztuko dira.
Elkarteko Zuzendaritza Batzordearen zati bat ere berritu egingo da batzar nagusi horretan, eta Lehendakari berria ere aukeratuko beharko dute bertaratzen direnek.
Elkarteko bazkide guztiei batzar horretara joateko dei egiten zaie, eta bide batez, elkarteko bazkide izanez gero, koruko kideren batekin harremanetan jarri edota kultur etxeko postontzian eskaera uztea besterik ez da egin behar.

Etorkinek euskara doan ikasteko aukera izango dute

eneritz maiz — Wed, 04 Jan 2012 12:07:12 +0000

Alegian bizi diren etorkinek euskara doan ikasteko aukera izango dute, herrian bertan. Alegiako Udalak gizarte zerbitzuen laguntzarekin batera, euskara ikasteko eta alfabetatzeko eskolak antolatu ditu. Otsailetik maiatzera izango dira, eta esperientzia pilotu bezala baliatuko dute lehen ekimen hau.
Eskolak otsailean hasiko dituzte, eta etorkinek izena hilaren 13a baino lehen eman beharko dute, kultur etxean edo gizarte zerbitzuetan. Astean bi ordu izango dituzte, eta klaseak astearte eta ostegunetan izango dira. Alfabetatzeko eskolak 15:00etatik 16:00etara, eta euskarazkoak 20:00etatik 21:00etara izango dira. Liburutegian izango dira, eta Kzgunea ere erabiliko dute. Behin taldeak osatuta, moldagarri izan daitezke talde hauek, guztien artean adostuta.
Inguruko herri txikietan bizi diren etorkinek ere izena emateko aukera izango dute.
Alegian, aste honetan argitaratutako datuek erakusten dutenez, 126 etorkin daude erroldatuta; horietatik 29 Europar Batasunekoak dira, eta 97 Europaz kanpokoak. Afrika, Hego Amerika eta Europa ekialdekoak dira gehienak. Maiatzean, dena ondo ateraz gero, kulturen arteko festa batekin bukatzeko ideia dute.

Unai Iraola Alegiako alkatea

«Herrian taldea sortzeko beharra sentitu dugu»

Unai Iraola Alegiako alkateak otsailean martxan jarriko duten esperientzia pilotu berri honen nondik norakoak azaldu dizkio Hitza egunkariari.
Nolatan hartu duzue euskarazko eta alfabetatzeko eskolak jartzeko erabakia?
Herrian dugun atzerritar kopurua ikusita, eta gizarte zerbitzuetako langileekin hitz eginda zinegotziok zerbait egiteko beharra sentitu dugu. Batez ere, etorkinek herrian hartu-emanak behar bezala izateko hizkuntzarekin dituzten mugak ikusten genituen. Herriko komertzioetan lan egiten dutenen aldetik ere, herritarrekin harremanak izateko dituzten zailtasunaz eta euskararen beharraz jabetu gara.

Unai Iraola, Alegiako alkatea

Eskolak herrian bertan izateari eman diozue garrantzia orduan.
Bakoitzaren bizitza baldintzengatik ezin izan dute euskarako eskolak hartzera Tolosara joan, eta herrian taldea sortzeko premia ikusi dugu. Era berean, etxeko eremutik gutxi ateratzen direnengana ere zuzendu nahi dugu, eta herrian bertan izateak lana erraztu du.
Bi eskola bereizi dituzue: euskara ikastearena eta alfabetatzearena.
Herrian dugun etorkin talde bat alfabetatu gabea da, ez dute oinarrizko alfabetizaziorik. Eta gainera, nahiz eta orain Euskal Herrian bizi, errolda asko aldatzen duten familiak izaten dira. Beraien kabuz trebetasunak hartzen joateko gaztelaniako hastapen klaseak jartzea pentsatu genuen, eta Tolosako Helduen Eskolarekin harremanetan jarri ginen. Bi behar horiei begira antolatu ditugu klaseak, eta otsailean hasi eta maiatza bitartean esperientzia pilotu bezala egingo ditugu.
Doan izango dira eskolak.
Bai. Euskara ikasi nahi duena, edo gaztelaniako hastapena behar duena klaseetara etortzea da gure helburua. Faktore ekonomikoa aitzakia ez izatea nahi genuen. Errekurtsu gutxi ditugu, eta bi hezitzaile bilatu ditugu, boluntario moduan ariko direnak. Oso jarrera ona agertu dute, eta hala ere, udaletik diru laguntza ezberdinak lortzen saiatuko gara.
Laguntzaren bat jasotzea ona izango da, ezta?
Bai. Auzolanaren kultura bultzatu behar da, baina honelako proiektu bat iraunkorra izatea nahi baldin bada, beti ezin duzu jendearen borondatearengan oinarritu.
Etorkinekin harremanik izan duzue?
Beraiekin bilera bat egina dugu gizarte zerbitzuetatik bideratuta. Proiektuaren helburuak eta asmoak azaldu zitzaizkien, eta jarrera oso ona agertu dute. Oso eremu euskaldunean bizi gara, eta beraietako batzuk euskara jakitearen garrantziaz konturatzen dira. Lanerako izateaz gain, beraien seme-alabak euskarazko hezkuntza jasotzen dute eta etxeko lanetan lagundu ahal izateko behar dute.
Astean bi ordu egingo dituzte.
Bai, bina ordu izango dituzte. Gazteleniako hastapenak arratsaldeko lehen orduan jarri ditugu, batez ere, emakumeak haurrak eskolan dauden bitartean ikastera joan daitezen. Eta euskarakoak, iluntzetan izango dira. Bi klasetara mugatu dugu hasieratik ez ditugulako erre nahi, eta bi horietara gogoarekin joatea.

Eibar eta Intxurre lagun artean

eneritz maiz — Tue, 03 Jan 2012 07:00:09 +0000

Urteari amaiera emateko, larunbat goizean, lagunarteko futbol partida jokatu zuten Alegiako Elorri futbol zelaian. Intxurrek, Bigarren B mailan jokatzen duen Eibar taldea hartu zuen etxean. Ezin hobeto moldatu ziren bi taldeak zelaian, eta partidako emaitza izan zen gutxienekoa. Ondoren, lagun artean bazkari ederra egin zuten bi taldeetako kideek.

Ikusle asko izan da X. Pilota Topaketako finaletan

eneritz maiz — Tue, 03 Jan 2012 06:49:18 +0000

Gabonetako X. Pilota Topaketako finalak ostiralean izan ziren Alegiako pilotalekuan. Harmailak jendez bete ziren finaleko bost partidak ikusteko, eta «giro oso ona» izan zela adierazi dute antolatzaileek. 92 pilotarik abiatu zuten txapelketa, eta horietatik 20 iritsi dira finalera. Ikusmin handia sortu zuten finaleko partidek.

Aurrebenjaminen partida izan zen orekatuena. Hamaikanako berdinketaren ostean, Adur Irastorza eta Jon Mikel Artolak lortu zuten garaipena, Joseba Rojas eta Aiur Benaventeren aurka. Benjaminetan, Iker Zubeldia eta Peru Azurtzak 5 tanto egin zituzten, Aitor Galartza eta Unai Altunaren aurka. Azken hauek lortu zuten garaipena poltsikoratzea. Alebinen mailan, Mattin Lakuntza eta Oier Zubeldiak irabazi zuten partida, eta aurkari zituzten Ioritz Ugartemendia eta Lander Karrera, 2 tantotan geratu ziren. Infantiletan, Jon Luzuriaga eta Enaitz Aizpitarte iritsi ziren 12. tantora, Gorka Altuna eta Iñigo Otamendi bikotea 6an utziz.
Kadeteen mailan, Eñaut Larrea eta Jon Irizar bikotea iritsi zen garaipena eskuratzera, aurkari zituzten Unai Eizmendi eta Beñat Beloki, 4 tantotan utziz.
Sariak ematen hiru pilotari aritu ziren. Ekaitz Saralegi pilotari profesionalarekin batera, Alegiako Artola eta Ikaztegietako Urretabizkaia etorkizuneko pilotariak aritu ziren.

Gabonetako X. Pilota Topaketako biharko finalak erabakita daude

eneritz maiz — Thu, 29 Dec 2011 12:38:22 +0000

Asteartean eta asteazkenean jokatu zituzten binakako pilota partidak, eta erabakita geratu dira finalera pasa diren bikoteen izenak. Finaleko partidak bihar, hilak 30, jokatu dituzte, 16:00etatik aurrera.

Aurre-benjaminen mailan, finalera iritsi dira Joseba Rojas eta Aiur Benaventek osatzen duen bikoa, eta Adur Irastorza eta Jon Mikel Artolak osatzen dutena. Benjaminetan, aldiz, Iker Zubeldia eta Peru Azurtzak, Aitor Galartza eta Unai Altunaren aurka jokatu beharko dute.

Alebinen mailan, Mattin Lakuntza eta Oier Zubeldiak osatutako bikoteak, Ioritz Ugartemendia eta Lander Karreraren aurka jokatuko du.

Infantiletan, Jon Luzuriaga eta Enaitz Aizpitarte, Gorka Altuna eta Iñigo Otamendik osatzen duen bikotearen aurka lehiatuko dira.

Kadeteetan, berriz, Eñaut Larrea eta Jon Irizarrek osatzen duen bikoteak, Unai Eizmendi eta Beñat Belokiren aurka jokatuko dute partida.

Sailkapen partidak Amezketa, Altzo, Alegia eta Ikaztegietako pilotalekuetan jokatu badira ere, aurten, finalak Alegiako frontoian jokatuko dituzte. 92 pilotarik hartu dute parte, eta guztientzat izango da saria. Merienda ere eskainiko diete.

Sari banaketara, berriz, etorkizuneko pilotariei sariak emateko pilotari profesionalak eta afizionatuak joango dira.

Eibarren aurka jokatuko dute Intxurrekoek, Alegian

eneritz maiz — Thu, 29 Dec 2011 06:45:27 +0000

Alegiako Intxurre futbol taldeko jokalariek Bigarren B mailako Eibar futbol taldearen aurka jokatuko dute partida. Etzi, hilak 31, Urte Zahar egunean izango da, Alegiako Elorri futbol zelaian.

Intxurre eta Eibarko futbolariak iaz jokatu zuten partidan

Eibartarrak Alegiara etorriko dira, eta 11:00etan emango zaio hasiera futbol partidari. Gabon egun hauetako atseden egunak aprobetxatuko dituzte lagunarteko partida jokatzeko.

Entrenatzaileak, adiskide
Manix Mandiola Eibarko entrenatzailea eta Santos Irazustabarrena Intxurrekoa adiskideak direla eta, antolatu dute lagunarteko partida. Hiru urte pasa dituzte partida hau Alegian jokatu nahian. Eibarko Ipuruan jokatuak dira, baina azkenean aurten etorriko dira Eibarko jokalariak Alegiako futbol zelaian jokatzera.