Martzelino Dorronosoro alkatea «gustura» agertu da kultur ekitaldiek izan duten erantzunarekin. Hamaika adineko animatu zirela gogoratu du bazkarira, «etxetik ateratzea kosta egiten zaie batzuei oraindik». Aurretik, Jakoba Rekondoren hitzaldia izan zuten herritarrek, eta «oso gustura egon ziren herritarrak, azkar pasa zitzaigun denbora».

Pasa den larunbatean, berriz, haurren txanda izan zen, eta Zirku tailerra izan zuten. “Haur asko elkartu zen eta oso ondo pasa zuten”, adierazi du, Dorronosorok. Txokolate beroa ere banatu zieten guztiei. Herritarrekin batera, kanpoan bizi diren familiako kideak ere animatu dira kultur ekitaldietan parte hartzera.

Igandeko bazkarian, babarrunak izan zituzten jateko, eta ez zen odolki eta saiheskirik faltatu. Arkaitz elkarteko zuzendaritzakoak prestatu zituzten, eta bazkari “ederra” prestatu zuten. 52 lagun elkartu ziren. Jarraian, haurrentzako pentsatua zegoen Eriz magoa izan zela gogoratu du alkateak, baina, “helduok haurrek baino hobeto pasa genuela uste dut”.

Zinegotziak berriak dira, eta kultur ekitaldiak antolatzerakoan denbora gainera etorri zitzaien. Hala ere, “giro ederra” izan da.

Hilabete hasierako euriteak, momentuz, Ibiur urtegia %31,80an bete du, egoera larriari irtenbidea emanez. Ura hornitzeko arazorik ez dute izango, eta ordain agirian iritsi den oharra zaharkitua geratu da. Hala ere, beharrezkoa izango da ura aurrezten jarraitzea.

Kultur Elejira

Azaroak 26, larunbata
Zirku tailerra. 16:00etan hasiko da haur eta gaztetxoentzako Zirku tailerra.
Ondoren. Txokolate beroa banatuko dute guztientzat.

Azaroak 27, igandea
Babarrun eta gaztaina jatea.  14:00etan Arkaitz elkarteak antolatuta, babarrun eta gaztaina jatea egingo dute.
Eriz magoa. 17:00etan haur eta gaztetxoentzako ikuskizuna, Eriz magoaren eskutik.

Baliarrain herria itxuraldatzen ari da. Iaz plaza guztia berritu zuten, eta orain erabilera anitza izango duen eraikina egiten ari dira, udaletxearen atzeko aldean. Gainean, orain bezala, plaza txiki bat izango du haur parkea eta guzti. Lokal eskasia zuen udalak, eta gaiari buelta batzuk eman ostean, udaletxearen azpiko aldeko lur zatia kenduz eremu horretan egitea bururatu zitzaien. Etxebizitza berriekin kale bat sortu dute, eta tartean lur zati handi bat zegoen inongo erabilerarik gabe. Alkatearen hitzetan, «herritarrek gustura hartu dute proiektua. Ezer ez zegoen leku bat aprobetxatu dugu», dio. Martxoan hasi zituzten obrak, eta urtea bukatu baino lehen amaitu nahi dituzte lan hauek. Erein programatik jaso dute diru laguntza proiektua aurrera ateratzeko. Laguntza eskuratuta, luzapena eskatu zutela gogoratu du Martzelino Dorronsoro alkateak. Orain, behartuta daude urtea amaitu baino lehen obrak bukatzera. Itxura hartu du eraikinak, baina oraindik barruan lana geratzen dela adierazi du Dorronsorok. Obra guztiak azkenean luze jotzen dutela gogorarazi du, baina bukatzen saiatuko direla. Behin obrak bukatuta, haur eskolak irteera zuzena izango du parkera. Alokairurako bi lokal Ezer ez zegoen lekuan, herritarren erabilerarako, 600 metro karratu inguru dituen esparrua atera dute. Bertan, adineko eta gazteentzako dinamizatzeko gela bat, herriko hiruzpalau baserritarrek duten belar elkartearentzako gela, eta hainbat ekitaldietarako sala handi bat ere izango dute. Era berean, udaletxe gainean duten liburutegia bertara pasako dute. Eraikina egiteko prestatu duten eremua zabala da, eta honez gain, bi gela alokairuan jartzeko izango dira. Beraz, eraikuntza osoa ez da herritarren erabilerarako izango, eta bi bulego prestatu dituzte alokairuan jartzeko. Lokal beharrean dagoen edonork, alokairuan hartzeko aukera izango du. Alkateak argitu duenez, honela, udalarentzat diru iturria izango da. Eta eraikinaren errentagarritasuna ahalbideratuko du. Tolosaldea Garatzenen bidez, maizterrak aurkitzen ahaleginduko direla adierazi du. Eraikina bukatzean, hornitzea faltako zaie baliarraindarrei. Hornitzeko diru laguntza ere eskatua dute, baina aurten ez diete onartu. Dorronsorok ordea, «datorren urtean berriz saiatuko gara laguntza lortzen», azpimarratu du.

Tolosaldeko eta Leitzaldeko hitzak, Gipuzkoako Urak kontsortzioko Josetxo Saizarrekin hitz egin du Ibiurko urtegiaren gaur egungo egoeraz.  «Bi urte daramatza martxan, eta oraindik ez da bete. Kezkatzeko adina dela esango nuke. Bilakaera juxtua darama, eta gaurko egoera ez da batere erosoa».  Era berean, oraindik datu historiko gutxi dauzka Gipuzkoako Urak kontsortzioak Ibiur urtegiaren inguruan, baina, «aurrekalkuluen arabera eta azken hilabeteko egoera mantenduko balitz, hiru bat hilabetetarako ura dago urtegian», azaldu du Saizarrek. Urte gutxiko bizia du oraindik Ibiur urtegiak; «egia da bi urte gutxi direla, baina datu zehatzak horiek dira».
Bigarren urtez, urtea lehor doala azpimarratu du, eta gainera euri gutxi egin du. Honen ondorio garbia, urtegian gero eta ur gutxiago dagoela da. Dagoeneko, «Urtsubi errekatik ura ekartzeko obrak martxan daude, eta aurten bertan bukatu nahi ditugu. Era berean, emari ekologiko bat ere mantentzen ari gara», adierazi du.

Urtebetez jarraipena egiten
Egoerari buelta emateko, duela urtebete hasi ziren gaur egungo  egoera aurreikusten, baina «ezer gauzatu ahal izateko, egungo egoera ekonomikoak ez du batere laguntzen» argitzen du.
Egunero-egunero egiten diote urtegiari jarraipena eta ur sarrerak, kontsumoak eta kalitatea kontrolatzen dituzte.

Urtebetez geroztik, «gain-gainean gaude, bai kaptazioko etekin egoera hobetzen, eta baita kalitate oneko beste ur iturriak aprobetxatzen ere. Neurri horiei esker, egun arrunteko eskariaren %25a aurreratzen ari gara», azaldu du Josetxo Saizarrek.
Egoerak oso okerrera joko balu, «‘gaitz handiarentzat erremedio handia’ esaten dena aplikatu beharko genuke, eta ur mozketa edo ez hain kalitate oneko urak aprobetxatzera jo beharko genuke», gaineratu du.

Arriaran eta Lareo urtegiak
Goierri eskualdean daude Lareo eta Arriarango urtegiak. Ibiurretik gertu, baina datu ezberdinak dituzte. Egia da, haiek urteak daramatzatela martxan. «Beste bailaratako egoerarekin parekatzeko, nire iritziz, eta epe motz batera, neurri sendoak hartu beharko liratekeela uste dut», azpimarratu du.
Hornidura aldetik, «Ibiur eta Arriaran urtegien arteko lotura, bata bestearen lagungarri bezala, beharrezkotzat joko nituzke», dio Gipuzkoako Urak kontsortzioko kideak.
Baliabideei dagokionean, berriz, Lareoko urtegi inguruan euri asko egiten duela dio, eta Amundarain ibaiak ur emari handia duela azpimarratu du. Bien arteko konpromiso batek lehorte eta eskasi garaiak bermatu beharko lituzkeelakoan dago. «Nire ustez, Lareok dituen aukerak gehiago aprobetxatu eta etekin gehiago atera beharko genioke».

Ibiurko urtegiaren ibilbidea, Lareoko urtegiarekin alderatzen badugu, «nahiko kaskarra» delakoan dago. «Bi urte besterik ez ditu, eta biak jarraian nahiko lehorrak tokatu zaizkio», gaineratu du. Ataungo Lareoko urtegia, gutxi gorabehera, Ibiurretik hamar bat kilometrotara dagoela gogoratzen du. Lareon botatako urarekin alderatuz gero, «euri kopuru erdia bota du Ibiurren», argitu du.

Bizi garen gizarte ereduan, askotan, ez da behar beste baloratua izan iturria ireki, eta ura ateratzea. Lehorte eta kalitate txarreko ura izan duten lekuetan, gehiago baloratzen dute ura izatea bera.
Kontsumo jasangarria dela eta, gizartea gero eta kontzientziatuago dago. Hala ere, gurean, guztion esku dago eta egongo da, uraren erabilera egokia eta zuzena egitea. Honelako garaietan, oraindik eta gehiago.

Euskal Herriko III. Bakarkako Sega Txapelketaren hirugarren eta azken saioa jokatu da Baliarraingo San Joan eremuan. Bertan eskualdeko hainbat segalari izan dira nazioarte eran. Guztira 35 segalari inguru aritu dira, emakumezkoak zein gizonezkoak. Azken saio honen ondoren, erabakita gelditu da zeinek ordezkatuko duten Euskal Herria Europako Txapelketan.