Alegialdeko Hitza » Bidegoian

Bidegoian Berria Txapelketaren final laurdenetarako sailkatu da

Alegialdeko Hitza — Tue, 07 Feb 2012 05:55:49 +0000

Bidegoiango pilotariek garaipen erraza lortu zuten iragan ostiralean Lizarraren aurka, IX. Berria Txapelketako kanporaketan. Final laurdenetara sailkatu diren lehenak izan dira Aurrera Saiazekoak, eta hurrengo aurkaria, Huarte eta Zaramagaren arteko lehiatik irtengo zaie.
Kanporaketa Asteasun jokatu zen, eta eguraldia aurka izan arren, jende ugari elkartu zen frontoian. Kadeteetan Chiapuso-Aburuzak erraz lortu zuten garaipena, aurkariak 6 tantotan utziz. Jubeniletan ere ezinean ibili ziren lizartarrak, eta 5 tanto egitea besterik ez zuten lortu. Nagusien partida jokatu aurretik, beraz, dena erabakirik zegoen. Lehen bi partidak galtzen dituenak, Nagusietan irabaziz gero, aurrera egiteko aukera izaten du tantoak gehituta. Kasu honetan, ordea, lizartarrek 22-0 irabazi izan balute ere, bidaniarrek tanto gehiago lortuko zituzten lehen bi partidak kontuan hartuta. Hala eta guztiz ere, zenbaketa beharrik ez zen izan partida amaieran, Urbieta II.ak eta Arratibelek 22-13 irabazi baitzuten azken partida.

Etxean konposta egiteko deialdia luzatu du Bidegoiango Udalak

eneritz maiz — Tue, 24 Jan 2012 14:44:47 +0000

Urola Erdialdeko Udal Elkarteak Gipuzkoako Foru Aldundiko Garapen Iraunkorrerako Sailarekin batera abian jarri nahi du etxean konposta egiteko seigarren kanpaina. Eta Bidegoiango Udalak ere bat egin du kanpainarekin.
Norberak bere etxean sortutako materia organikoa konpostatu eta berrerabiltzea da helburua. Bertan parte hartzeko lorategi txikia edo baratza izatea nahikoa da. Ondoren lortutako konposta bertan berrerabiliko da.
Kanpaina honetan parte hartu nahi dutenei konpostagailua, horren erabilpenerako ikastaroa eta liburuxka dohain emango zaizkie. Baita aholkularitza zerbitzua ere, sortzen diren zalantzak telefonoz edo posta elektronikoz argitzeko. Izena eman nahi dutenek Urola Erdialdeko Udal Elkarteko 943 85 73 19 telefono zenbakira deitu edo ueue@udal.gipuzkoa.net helbide elektronikora idatzi dezakete, hilaren 31a baino lehen.

«Zerrenda horretan egotea guretzat bizia da»

eneritz maiz — Fri, 20 Jan 2012 06:30:57 +0000

Iban Muñoa, Iriarte Jauregiko jabea

Familiako negozioa aurrera darama Iban Muñoak. 2009ko udan, Bidegoianen ireki zuen Iriarte Jauregia hotela Lorena Arco emaztearekin batera. Atzo jakin zuten, Estatu mailan, Traveller’s Choice Hotels sarietan seigarren postua eskuratu dutela. TripAdvisor munduko bidaien webgunea da, eta Fitur azokan eman dute sarien berri.

Iriarte Jauregiaren aurrean, Lorena Arco eta Iban Muñoa

TripAdvisor webguneak ematen dituen Traveller’s Choice Hotels sarietan 6. postua eskuratu duzue. Nola jaso duzue albistea?
Egia esan gaur goizean [atzo] enteratu gara, eta oso oso pozik hartu dugu albistea. Hotel bat eguneroko azterketa da, eta sari honek duen berezitasunik onena da ez dela komite txiki baten iritzia, baizik eta, bozkatzen dutenak bisitariak beraiek direla. Izugarri harro gaude.
Bisitariek emandako saria izateak garrantzi berezia izango du, ezta?
Garrantzi oso berezia du. Sari batzuk aldizkariek edo erakunde pribatuek ematen dituzte, eta azkenean hori subjektu pribatu batek asmatu dezake. Baina hau ezberdina da. Ehunka lagun pasa dira hemendik, eta iritziak eman ondoren, Estatu mailako ia 3.000 hoteletatik gurea seigarrena izatea izugarrizko lorpena da. Gainera, TripAdvisor mundu mailakoa da, eta webguneak berak duen oihartzuna nazioartekoa da.
Bisitariek zer baloratu dutela uste duzu?
Guk beti bi plano daudela esaten dugu. Toki zoragarria izan daiteke: argi politak, ohe erosoak, dekorazio ikusgarria,… baina guzti horri arima bat ez badiozu ematen, gauza bat besterik ez da. Hotel polita egitea epe mugatu bateko ahalegina da. Lortu edo ez lortu, lan hori egina dago. Gero bi lan daude. Alde batetik, lortu duzun hotela denborarekin mantentzea izango litzateke, eta bestea, atetik sartzen den pertsona oro errespetatzea izango litzateke. Denek ordaintzen digute, denek merezi dute begirada bat, irribarre bat, atentzioa,… Gure bisitariak ez dira bertakoak. Euskal Herrikoak izaten ditugu, baina gehiengoa, Estatu mailakoa edo mundu mailakoa da. Estatutik eta atzerritik gu eta Euskal Herria bisitatzera datozenei esker ona emateko argudioa azalpenak ematea da.
Bertako informazioa ematea esan nahi duzu?
Hotela bai, baina non dauden, zer bisitatu behar den, gastronomia,… azalpenak eman behar zaizkie. Ordaintzen ari denean, hotelaz gain, hiru edo lau egunetako esperientzia ari da ordaintzen. Esperientzia zoriontsua izan bada, hotelak zoragarria izaten jarraitzen du. Nolabait, Euskal Herria ezagutzen eta egun horiek ongi pasatzen laguntzen diegu. Bisitarien nahien araberako irteerak eskaintzen dizkiegu. Tontakeria dirudi, baina gurea bezalako hoteletan zoriontasuna saltzen dugu. Azterketa orokorra da, eta hori da gure bidea eta horrela sinesten dugu.
Bisitariei esker webgune batek honelako saria emateak, aurrera jarraitzeko indarra emango du?
Harrituta geratu gara. Bakoitzak bere lana normalizatu egiten du, eta egunero duzun hoberena eman behar duzu. Zaila da hona heltzea, baina zailagoa izaten da mantentzea. Orain, etorriko diren bisitari guztiek Estatu mailako seigarren hotelik onena espero dute. Ardura bat da. Lehen lana ondo eginez harridura sortzen genuen, baina orain dagoeneko hori espero dute, eta ezustekoa bukatu da. Orain zailagoa izango da, baina gure helburua hurrengo urtean ere ea berriz zerrenda horretan gauden izango da, eta zergatik ez bosgarrenak! Azkenean, honelako proiektu pertsonalek, bizitzaren traiektoria daukate. Hau ez da enpresa handien hotela, baizik eta familia batena. Eta hor egotea guretzat bizia da.
2009ko udan ireki zenuten krisialdi betean. Epe labur honetan zein izan da ibilbidea?
Zaila da. Krisialdian sortutako enpresa bat gara, eta egoera ekonomiko horretan jaio ginen. Gure bidea egiten ari gara. Zerbitzu hau eskaintzea oso garestia da, eta jendeak ulertu behar du. Hemeretzi gelako produkzio batean, atentzio pertsonalizatua, dena goxo eta txukun izateak kostu handia du. Zaila izaten ari da, baina era berean zirraragarria da. Ordu asko sartzen ari gara , eta lan talde txikia gara.
Zein motatako bisitariak iristen dira Iriarte Jauregira?
Gure bisitarien gehiengoa Euskal Herrikoa da. Estatutik datozenen artean Madriletik eta Bartzelonatik etorritakoak daude. Eta gure bisitarien %40a atzerritik etorritakoek osatzen dute, hau da, mundu mailakoa. Eta gehiengoa, estatubatuarra da. Eta horregatik gaude, oso pozik, TripAdvisor mundu mailakoa delako. Eta oso polita da guretzat.

Agate Deuna bezperan kantuan ateratzeko entseguak deitu dituzte

eneritz maiz — Thu, 19 Jan 2012 06:30:01 +0000

Ikaztegietan eta Bidegoianen Agate Deuna bezperarako eztarriak berotzen hasi dira. Otsailaren 4ean, larunbatean, izango da. Bidegoianen dagoeneko lehen entsegua egina dute.
Beste bi entsegu deitu dituzte, eta hilaren 23an eta 30ean egingo dituzte Goiazko eskolan, 21:00etatik aurrera. Iaz bezala, otsailaren 4ean arratsaldez aterako dira kantuan. Etxez etxe kantuan ibiliko dira, eta afariarekin emango diote amaiera egunari. Bidania-Goiazko kultur taldeak antolatu du, eta herri osoari luzatu diote gonbidapena.
Ikaztegietako emakumeek ere azken urteetan ongi sustraitutako ohitura dute Agate Deuna bezpera. Aurten ere ez dute hutsik egingo, eta kantuan ibiliko dira. Guztia behar bezala ateratzeko, gaur, 21:00etan entsegua egingo dute kiroldegian.

Bidegoiango Udalaren eta HITZAren akordioa, euskarazko prentsa sustatzeko

Tolosaldeko eta Leitzaldeko Hitza — Wed, 18 Jan 2012 23:10:17 +0000

Euskarazko tokiko prentsa sustatzeko, Bidegoiango Udalak eta Tolosaldeko eta Leitzaldeko HITZAk akordioa adostu dute. Hitzarmen horren arabera, Tolosaldeko eta Leitzaldeko HITZAren edizio bakoitzaren aleak banatuko dira herriko hainbat tokitan: Kontsejun, Dendalen, Harategian eta Toki-Alai tabernan. Honela, herritarrek hala nahi izanez gero bertatik eskuratu ahal izango dute egunkaria.
Banaketaren kostuari aurre egiteko, Bidegoiango Udalak 2012 ekitaldirako 680 euroko diru laguntza emango dio HITZAri. Urte honen amaieran, bai udalak eta baita HITZAk ere, Bidegoiango herritarrei eskualdeko euskarazko egunkariaren harpidetza egiteko gonbitea luzatuko diete. 2013 hasieran, bi aldeek saiakera honen balantze objektiboa burutuko dute. Aipatutako lekuetan egunkariaren banaketa egiteak, ez die aldaketarik eragingo egun HITZAren harpidedunak diren Bidegoiango herritarrei. Hauek egunkaria etxean jasotzen jarraituko dute. Akordio honen bidez, bai udalak nola HITZAk, harpidedun hauei harpidetza mantentzeak duen garrantzia gogorarazten die. Izan ere, 2012ko banaketa berezi honen helburua, 2013rako ahalik eta harpidedun gehien lortu eta eskualdeko euskarazko prentsa indartzea da.
Udal hauteskundeen ondoren, Bidegoianen eratu zen udal berriaren alkate eta alkateordearekin hainbat bilera egin ditu HITZAko kudeatzaileak. Hain justu, bilera horien helburua, Bidegoiango herritarrei euskarazko prentsa eskuratzeko ahalik eta erraztasun handienak ematea izan da. Horri erantzuna emateko burutu da akordioa.

Udalaren diru kontuak azalduko dituzte Bidegoianen

eneritz maiz — Tue, 13 Dec 2011 13:44:43 +0000

Bidegoiango Udalak, ostegunean, hilaren 15ean, batzarra egingo du. 21:00etan emango diote hasiera, eta bertan diru kontuen berri emango dute. Hau da, Udalak gaur egun duen egoera zein den azalduko dute: 2011. urteko diru kontuak argituko dituzte, 2012. urteko aurrekontua itxiko dute, eta Udalak gaur egun dituen maileguen berri emango dute.

Herritar guztiak gonbidatu nahi dituzte bertan parte hartzera.

Sukaldean, «gustura»

Alegialdeko Hitza — Wed, 07 Dec 2011 20:17:07 +0000

Goiatz Bidani kultur taldeak sukaldari ikastaroa burutu berri du. «Arrakasta dezente» izan duela diote antolatzaileek: «Partaideak oso gustura jardun dira eta sukaldaritzari buruz asko ikasi dute». Kultur taldeak eskerrak luzatu dizkio Azpeitiko Jai-Alai jatetxeko sukaldariari eta baita Saiaz elkarteri ere.

Jai Alai jatetxeko sukaldariaren ikastaroa

Alegialdeko Hitza — Mon, 07 Nov 2011 16:08:34 +0000

Bidania-Goiatz Kultur Taldeak sukaldaritza ikastaro bat antolatu du, Jai Alai jatetxeko sukaldari batekin. Ikastaroa hilaren 15ean, 21ean eta 28an izango da, 18:00etatik 21:00etara, Sayaz Elkartean. Izena 659752182 (Arkaitz) telefonoan eman daiteke. Gaur amaitzen da epea.

Intxurre, Aurrera Saiaz eta Zazpi Iturrikoen partidak, asteburuan

Alegialdeko Hitza — Thu, 13 Oct 2011 16:07:44 +0000

Bihar eta etzi, Ikaztegieta, Amezketa, Alegia eta Bidegoianen jokatuko dira hainbat pilota partida. Ikaztegietan hasiko dituzte partidak, bihar, 19:00etan. Intxurreko infantilen hiru partida izango dira lehenengo, eta laugarren partida neskek palan jokatuko dute.
Bidegoianen ere ordu berean hasiko dira, eta hiru partida jokatuko dituzte Aurrera Saiazeko pilotariek. Amezketan, 19:30ean hasiko dira biharko partidak, eta bost partida jokatuko dituzte Zazpi Iturrikoek.
Larunbatean, Ikaztegietako frontoian bertan, 11:00etan hasita bi partida jokatuko dira. Arratsaldean, berriz, 16:00etan hasiko dira Alegian eta Bidegoianen izango diren partidak. Alegiako frontoian lau partida jokatuko dituzte Intxurre pilota elkarteko alebinek eta infantilek. Bidegoianen, berriz, bost partida jokatuko dira, baina horietako lau partida izango dira Zazpi Iturriko pilotarienak.

Afaria Kultur Asteari ekiteko

Alegialdeko Hitza — Mon, 19 Sep 2011 16:08:26 +0000

Larunbatean ekin zioten Bidegoianen kultur asteari. Bertso-kantu afaria izan zuten Goiazko frontoian, Iker Zubeldiarekin. 70 lagun inguru elkartu ziren bertan, giro ederrean. Gaur Gipuzkoa Mendiz-mendi, mendez mende autobusa izango da egun osoan, arratsaldean ipuin kontalaria, eta iluntzean Jose Luis Kortaren hitzaldia.