Alegiako herritarren bilgune da Tontokale. Mugimendu handia dago, eta ibilbideari hasiera emateko, San Juan kalea eskuinetara hartuko da. Udaletxe aurretik pasa, eta kale estuan zehar elizaren ondotik pasako da. Kale amaieran, Oria ibaiaren ertzeko paseotik egingo da bidea. Eskuinetara bidegorria izango du, eta baita baratzak ere.
Oria ibaian dagoen presa ikus daiteke, eta atsedena hartzeko aulkiak ere badaude, baina bueltarako uztea hobe izango da. Hasi besterik ez da egin ibilbidea. Errepidea bidegorrirantz gurutzatu beharko da, baina zebrabiderik ez dagoenez, arreta handiz egin beharko da.
Behin bidegorrian egonda, ez dago galtzeko arriskurik. Aldabako bidegurutzera iritsiko da. Bertan ezkerretara begiratuz gero, Gorotzonea baserria dago. Gipuzkoan Bergarako beste baserri batek baino ez duen bitxikeria du: garaia edo horreoa. Galizian edota Asturiasen ohikoak dira ikustea. Oinplano errektangeluarra eta bi isuriko teilatua dituen eraikin osagarria da. Buruan arbelezko plaka bana dituzten sei pilaretxoren bidez dago altxatua, lurretik. XIX. mendearen bukaera aldera eraiki zuten baserriarekin batera, eta, Norteko burdinbidea zela medio bota behar izan zuten lehengo baserria ordezkatzeko eraikia izan zen.
Bidegorrian aurrera jarraituz,  ezker aldean, industrigunea pasako du ibiltariak. Zelai berdeak, eta autobia ere begien bistan izango ditu. Ia Ikaztegietara iristear dago, eta lehen etxeak ikusiko ditu. Eskuinetara, lau arku dituen zubia dago; azpitik Oria ibaia pasatzen da, eta gainetik, trena. Ibilbideko lehen maldatxoa igo behar da. Herrigunera sartzearekin batera bidegorria amaitu egiten da, eta herrigunerainoko bidea espaloi bidez egingo da. Iritsi ahala, eliza eta udaletxeko eraikin berria ikusiko dira. Herriko Ostatua, berriz, ezkerretarako geratzen da.
Ikaztegieta errepideak eta trenbideak erdibitzen dute.  San Lorentzo izenez ezagutzen dira herriko ia kale guztiak. Zubia gurutzatuz gero, plazara sartuko da. Lasaia da, eta haurrekin jolasean ibiltzeko modukoa. Parkea ere bertan dago, udaletxearen aurrean. Eta alboko eraikinean, eguzki erlojua ikus daiteke.
Etorritako bidetik egingo da Alegiarako bidea. Herrira iristerakoan, ordea, San Juan kaletik jaitsi beharrean, Oria ibaiaren ertzeko pasealekutik pasako da. Tartean, herriak duen puntu xarmangarrienetako bat dago, zubi zaharra. Udaletxearen atzeko aldeko arkupetik pasa, eta Larraitz auzora doan errepidea gurutzatu Kale Beherara iritsiko da ibilbidea bertan amaituz. Atseden hartzeko toki paregabea dago.

Pasa den astean Urretxun jokatu zituzten partidetan, lehenengoan 22 eta 9 galdu ostean, bigarren partida erraz irabazi zuten alegiarrek, urretxuarrak 7 tantotan utziz. Azken eta hirugarren partidan, berriz, 22 eta 12 galdu zuten alegiarrek. Udaberriko txapelketa Bihar jokatuko dituzte Udaberri txapelketako partidak Alegia, Altzo eta Ikaztegietako frontoietan. Altzon, 18:30ean hasiko dira, eta Alegiako eta Ikaztegietako partidak 19:00etatik aurrera jokatuko dituzte. Intxurreko pilotariak infantil, kadete, jubenil eta nagusi mailetan ariko dira, eta herri bakoitzean launa partida izango dira jokoan.

Alegiarrek jai eguna izan dute gaur. Euskal Herria- Palestina Elkartasun Eguna izan dute herrian, eta goizetik ekitaldi ugari izan dituzte. Lehenik eta behin, olibondoak landatu dituzte, eta harrera ekitaldia eta gero, bazkaria ere egin dute. Dantzari txikien txanda arratsaldean izan da, eta urduri bazeuden ere dantza saio bikaina eskaini dute.

21:00etan zahagi ardoa egingo dute, eta bukatzeko, Manillares Iturriagaren kontzertua entzun ahal izango da Gaztetxean.

Iker Karrera

Iker Karrerak (Amezketa, 1974) hainbat urte daramatza mendi lasterketei lotuta, eta ultratrail probetan Salomon taldearekin lehiatzen ari den bigarren urtea da aurtengoa. Amezketarrak iaz denboraldi ona egin zuen, eta aurtengo denboraldiari ere hasiera bikaina eman dio. Asteburuan, Kanariar Uharteetako La Palman (Espainia) egiten den Transvulcania lasterketan parte hartuko du. 83 kilometro egin beharko dituzte korrika, eta Kilian Jornetekin batera, faboritoetako bat izango da.

Denboraldia hasi baino ez da egin, eta dagoeneko bi garaipen eskuratu dituzu. Denboraldi hasierarekin gustura, ezta?

Bai. Momentuz emaitzei dagokienez behintzat gustura nago. Hori bai, oraindik hasi besterik ez da egin eta lan asko dago egiteko.

Espero bezala hasi zara, edo ezustea izan da TNF 100 Filipinas eta Ultra Trail Citadelles irabaztea?

Lehenengo lasterketa hauetan emaitza baino garrantzitsuagoa da ondoren etorriko diren karreretara begira prestaketa lanak ondo egitea. Test bezala izaten dira proba horiek. Norbera nola dagoen ikusteko balio dute, eta gerorako helburuei begira ondorioak ateratzeko. Ez neukan helburu garbirik jarrita lasterketa hauetarako, baina irabaztea beti da gustagarria.

Asteburuan, Transvulcanian parte hartuko duzu. Garaipena eskuratzeko asmotan zoaz?

Nire nahia ahalik eta lasterketarik hoberena egitea da. Dena ematea. Pare bat lagun kenduta, momentuko hoberenak egongo dira irteeran eta irabaztea oso zaila izango da, ezinezkoa ez esatearren.

Iazkoa berezia izan zen. Herasekin batera helmugaratu zinen. Aurten ere aurkari izango duzu?

Ez, bera ezta izango, baino aurkari faltarik ez dut izango.

Lavaredo, UTMB, Hiru Handiak, Grand Raid Isla Reunion,… Zein da zure aurtengo helburu nagusia?

Denak dira lasterketa erakargarriak. Izenagatik, ezin ukatu UTMB berezia dela, baina besteak inoiz egin gabe ditudanez, gogo berezia dut hauentzako.

Karrera zubia zeharkatzen, Filipinetako proban

UTMB munduko probarik garrantzitsuenetakoa da. Iaz bigarren, eta aurten? Kilian Jorneti irabaztea posible da?

Kilianek esana du aurten ez dela izango bertan, beraz ez dut berari irabazteko aukera hori izango. Baina seguru naiz, bera ez izateak, garaipenerako gainerako guztion aukerak gehitzen dituela. Aurtengo zitarako, ordea, seguru bereziki prestatuta joango dela jendea.

Iazko denboraldi bikainak zertan aldatu du zure prestaketa? Orain zailena zer da, mailari eustea?

Prestaketan beti zoaz gauzak ikasten, egindako akatsetatik ikasten baitu batek, eta alde horretatik beti daude gauzak hobetzeko. Gora iristen bazara, noski, zaila da hor goran denbora askoan irautea. Goran irauteko egin behar den esfortzua kontutan hartuta, zaila da. Motibatuko zaituen helburuak topatu behar dira. Zorionez mendi asko daude eta munduan zehar asko dira oso erakargarriak. Momentuz gogo faltarik ez dut entrenatzen jarraitzeko.

Zer moduz moldatzen zara lana eta entrenamenduak uztartu, eta lasterketetan parte hartzeko?

Ahal dudan bezala moldatzen naiz. Asteburuan sartzen ditut ordu gehienak, eta astean zehar saio motxagoak eginez moldatzen naiz nire prestakuntza egiteko.

Kilometro asko, hotza, beroa, gauez korrika egitea,… zer da gogorrena zuretzat?

Gauez korri egitea gogorra da, askoz nekagarriagoa baita bai buruarentzako, eta baita gorputzerentzako ere. Horretaz aparte, lasterketa guztietan izaten da baxualdiren bat, hainbat arrazoiengatik. Momentu horretan aurrera egiteko indarra ateratzea izaten da zailena.

Zer ematen dizu mota honetako lasterketetan parte hartzeak?

Neurtu litezken gauzen aldetik, jende berria ezagutzea, leku berriak, kultura desberdinak eta mendi desberdinak egongo lirateke. Nahiz eta hori beste modu batera ere egin daiteken, talde batean egoteak bestela inoiz iristeko aukerarik izango ez nukeen lekuetara iristeko aukera ematen dit. Era berean, eta kirola egitea gustatzen zaidan neurrian, kirol helburu batzuk planteatu eta hauek lortzeko aukera eskaintzen dit. Neurtu ezin direnen artean, berriz, bestelako bizipenak, sentimenduak, esperientzia pertsonalak… daude. Gainera, pentsatu nahi dut pertsona bezala ere aberasten laguntzen didaten gauzak direla.

Bukatzeko, eta zure denboraldiarekin lotu gabe, ekainaren 9an entrenamendu saio bat eta hitzaldia emango dituzu, Larraitzen. Bi ordu eta erdiko saioa izango da (20 kilometro). Nori zuzendua dago, eta zer izango den azaltzerik bai?

Iker Karrera

Mendian korrika egitea gustatzen zaion edonori dago zuzendua, goiz pasa bat eginez, Larraitzetik abiatuta, Txindoki inguruetako bideetan korrika egiteko gogoz dagoen edonorentzat izango da. Lehenik korrika saio bat egingo dugu, eta ondoren, jendeak mendian korri egitearen inguruan eduki ditzakeen galdera eta zalantzei buruz ariko gara. Modu ireki eta lasai batean hitz egiteko aukera izango da.

Ni, nire esperientzian oinarritutako azalpenak ematen saiatuko naiz. Hori bai, garbi utzi nahi dut, nik ez dakidala honetaz beste edozeinek baino gehiago, soilik ibiltzearen eta hanka sartzeen ondorioz ikasi dudana da. Esperientzia gehiago eduki dezaket, eta hori norbaitentzat baliagarri bada, hori transmititzea da soilik nire nahia.

Bete beharreko baldintzak

Hezitzaileen aukeraketan parte hartzeko, ezin bestean bete beharreko baldintzen artean, 18 urte beteta izatea edo 2012. urtean betetzea, eta ekainaren 9an Amezketan antolatuko den formakuntza ikastaroan parte hartzea izango dira. Horrez gain kontuan izango dituzte: aisialdiko begirale edo zuzendari titulua izatea; herrikoa izatea; heziketarekin zerikusia duten ikasketak izatea: irakasle ikasketak, jendarte hezkuntza, pedagogia, psikologia, jendarte integrazioa, dinamizatzaile soziokulturala…; antzeko lanetan esperientzia izatea eta sorosle titulua izatea.

Taldea osatzerakoan oreka bilatuko da. Herrian bertan izango den formakuntza ikastaroa 09:30etik 13:30era eta 16:00etatik 20:00etara izango dela jakinarazi dute udaletik. Dohainik izango da, eta bazkaria bertako ostatu batean izango da. Menua 11 eurokoa izango da, eta norberak ordaindu beharko du.